सर्खारलाई भुइँमान्छेको पत्र :
१. अब छिट्टै मनसुन आउंदैछ ! पहाडहरु थर्केका र चर्केका छन् ! व्यापक रुपमा बाढी पहिरोको सम्भावना छ ! ठूला सडकहरु पहिरोले बन्द हुनसक्छन ! जसको कारण बिरामीलाई अस्पताल जान असम्भब हुन्छ ! खाधान्न तथा पेट्रोलियम पदार्थको अभाव हुनसक्छ ! नदीको किनारामा रहेका बस्तीहरु बाढीबाट र डाँडामा रहेका बस्ती पहिरोबाट जोखिमपूर्ण छन् ! त्यसको लागि के तयारी छ ? बैकल्पिक सडकको सुधार, जोखिम बस्तीलाई स्थानान्तरण र हाइवेमा पहिरो जाने ठाउँ पहिचान गरेर रोकथामको उपाय सुरु गर्न ढिला भएन र ?
२.महाभूकम्पको कारण असंख्य पशुपंक्षी मरेका छन्, मानिसका समेत सबै शब निकालिसकेको स्थिति छैन ! भत्केका संरचनाको कारण घरभित्रको फोहोर, फुटेका ढल, सेफ्टी ट्यांक आदिमा बर्खाको पानी मिसिएर पुरै बस्ती प्रदुषित हुनेछ ! त्यो बेला झाडाबान्ता, हैजा, आउँ, टाइफाइड, जन्डिस देखि बिभिन्न सरुवा रोगको महामारी फैलिन सक्छ ! त्यो महामारी रोक्न आबश्यक तयारी के छ ? अहिलेदेखि स्टोर नगरे महामारीले ठूलो क्षति भएपछि हारगुहार गर्ने हो कि ? यसमा ध्यान जाओस ! हामी भोलेन्टियर काम गर्नेछौं तर औषधि उपकरणको जोहो गर्नुपर्यो !
३. भूकम्पले आंशिक क्षति भएका, चिरिएका घरहरु बर्खाको पानीले भत्किनेछन ! तसर्थ पून : जनधनको क्षति नहोस भन्ने हेतुले यस्ता संरचना तुरुन्त भत्काएर थप क्षति कम गर्न किन ढिलाइ भएको छ ?
४. पाल र बर्खा धान्न नसक्ने अस्थायी टहरा कुन कुन सुरक्षित छन् ? कुन कुन सुरक्षित छैनन् ? त्यसको अनुगमन र मर्मत सम्भारमा ध्यान दिन ढिला भयो कि ?
५. नेपाल कृषिप्रधान देश हो ! किसानले बर्षौं पसिना बगाएका बालीनाली संरक्षण कहाँ र कसरी गर्ने ? बजारीकरण कसरी गर्ने ? यो तर्फ जनजागरण दिन ढिलाइ भयो कि ?
६. स्थानीय निकायको अभावको कारण राहत सामग्री वितरणमा भएको मनपरी रोक्न कुनै संरचना बनाउने हो कि ? हरेक जिल्लामा दैबी प्रकोप ब्यबस्थापनको तयारी गर्नुपर्ने हैन र ?
७. धेरै स्कुल, अपार्टमेन्ट, होटेल तथा अग्ला भवनहरुले हतार हतार प्लास्टर र रंग लगाएर बाहिर " केहि नभएको जस्तो " देखाउने खतरनाक काम हामीले मात्र देखेका छौं कि सर्खारले पनि देखेको छ ? यो तुरुन्त रोक्नुपर्यो !
८. बर्खाले उपद्रो मच्याउनु अघिं दाताहरुलाई एक एक जिल्ला वा एक एक गाउँ बनाउन प्रोत्साहित गर्न ढिलो हुँदैछ ! भौतिक सहयोग मागे सत्तामा बस्नेको जिब्रोमा र्याल कम आउंथ्यो कि ?
९. किसानलाई बर्खा अघिं गाउँगाउँमा बिउ र मलको उपलब्धता पुर्याउन ढिलो भएन र ?
१०. बर्खाको समयमा एकजना पनि भोको पेट खुला आकासमा बस्त्रहीन भएर बस्नुपर्यो भने सर्खार भन्ने जन्तुको अस्तित्व रहला र ?
0 comments :
Post a Comment