ललितपुर, डिसेम्बर २३प्रधानमन्त्री केपी शर्मा ओलीले राजनीतिक दलले दलगत स्वार्थभन्दा माथि उठेर राष्ट्रयताको जगेर्ना गर्न लाग्नुपर्ने बताएका छन् । नेपाली कांग्रेसका नेता स्व कृष्णप्रसाद भट्टराई आश्रम प्रतिष्ठानद्वारा आयोजित कार्यक्रममा बोल्दै ओलीले भने, ‘आम नेपालीलाई साथमा लिएर राजनीतिक दल दलगत स्वार्थभन्दा माथि उठेर राष्ट्रियताको जगेर्नामा लाग्नुपर्छ ।’
ओलीले जतिसक्दो छिटो संविधान कार्यान्वयन गर्नुपर्नेमा जोड दिएका छन् । बुधबार आयोजित सन्त नेता भट्टराईको शालिक अनावरण तथा ९२ औँ जन्मजयन्ती कार्यक्रमलाई सम्बोधन गर्दै उनले सबै राजनीतिक दल एकताबद्ध भई संविधान कार्यान्वयन गर्नुपर्ने र देशलाई विकास पथमा लैजानुपर्ने बताए ।
लोकतन्त्रलाई संस्थागत गर्न र देश विकासलाई गति दिन सरकारले अहम् भूमिका खेलिरहेको बताउँदै उनले गम्भीर रुपमा कूटनीतिक पहल अगाडि बढिरहेकाले छिट्टै नाकाबन्दी खुल्ने विश्वास व्यक्त गरे ।
सन्त नेता भट्टराईले देश र राष्ट्रियताका लागि सबैलाई साथमा लिई अगाडि बढेको स्मरण गर्दै उनले भट्टराई जस्ता नेता मुलुकका लागि खाँचो भएको बताए ।
नेपाली कांग्रेसका वरिष्ठ नेता शेरवहादुर देउवाले सन्त नेता भट्टराईको जीवनीबारे प्रकाश पारेका थिए । नेता भट्टराईको पालामा छ महिनाभित्र संविधान बनेको र कार्यान्वयन समेत भएको स्मरण गर्दै उहाँले भट्टराई नेपाली राजनीतिक इतिहासमा सफल नेताका रुपमा स्थापित भएको बताए ।
प्रतिष्ठानका अध्यक्ष पिएल सिंहले सन्त नेता भट्टराईले देखाएको बाटोमा नेपालका राजनीतिक दल हिड्न सके देशले काँचुली फेर्ने बताए । रासस
About Unknown
0 comments :
Post a Comment