काठमाडौं, चैत्र २५ - संविधानसभा अध्यक्ष सुवासचन्द्र नेम्वाङले सहमतिका लागि उपयुक्त समय आएको उल्लेख गर्दै त्यसको सही सदुपयोग गर्न दलहरूलाई आग्रह गरेका छन् । बुधबार प्रमुख दलका सचेतकहरूको बैठक राखी नेम्वाङले चैत मसान्तसम्म संविधानका विवादित अन्तर्वस्तुमा सहमतिमा पुग्न झकझक्याएका हुन् । 'आमहडताल फिर्ता लिने प्रतिपक्षी मोर्चाको निर्णय र सहमतिका लागि सबै दलहरूले जनाएको प्रतिबद्धताले राम्रो वातावरण सिर्जना गरेको छ,' प्रमुख सचेतकहरूसँगको छलफलपछि नेम्वाङले भने । सत्तापक्षलाई सार्थक वार्ताको अपिल गर्न र प्रतिपक्षलाई चैत २७ गते तय गर्ने भनेको थप आन्दोलनका कार्यक्रम घोषणा नगर्न पनि उनले विशेष आग्रह गरेका छन् । 'सहमतिका लागि आएको यो अवसर गुम्न दिनु हुँदैन,' नेम्वाङले भने ।
दलहरूबीच संविधानका अन्तर्वस्तुमा सहमति जुट्ने विश्वासमा चैत ३० का लागि डाकिएको संविधानसभा बैठकको कार्यसूचीसमेत तय नगरेको नेम्वाङको भनाइ थियो । बैठकपछि एमाओवादी संसदीय दलका प्रमुख सचेतक गिरिराजमणि पोखरेलले भने, 'विवादित सबै विषयलाई प्याकेजमा समाधान गर्नुपर्छ । हामीले प्रमुख दलका शीर्ष नेताहरूको बैठक राख्न सुझाव दिएका छौं ।' सभाध्यक्ष नेम्वाङले कांग्रेस, एमाले, एमाओवादी र मधेसी दलका शीर्ष नेताहरूसँगको अनौपचारिक परामर्शपछि मात्रै औपचारिक बैठक राख्ने तयारी गरेका छन् ।
इ-कान्तिपुरबाट
0 comments :
Post a Comment