म रमेश महत । भूकम्प पीडितहरुको राहतका लागि म केही दिनदेखि नुवाकोटमै छु । जनताका दुःखमा आफ्नो ठाउँबाट केही गर्न सकिन्छ कि भनेर निरन्तर लागिरहेको छु । कतिले यो कुरा लुकाउँछन्, तर मान्छेलाई आफ्नो जन्मथलो निकै प्यारो लाग्छ, प्रिय लाग्छ । आफ्नो जन्मभूमि पीडा र दर्दको आहालमा डुब्दा को पो चुप लागेर बस्न सक्छ र ? जन्मभूमिको यही दुःख र पीडा सहन नसकेर म उनीहरुको घाउमा मल्हम लगाउन भूकम्पपछिका दिनहरुमा नुवाकोटमै उद्दार र राहतका कार्यक्रमहरुका साथ पीडितको सहयोगका लागि जुटिरहेको छु ।यस्तोमा आजै मात्र मेरो चरित्र हत्या हुने गरी एउटा खबर सार्वजनिक भएको रहेछ, यो कुरा मैले केही समयपछि थाहा पाए । यो सुनेर म निकै दुःखी र स्तब्ध भएको छु । एउटा देश र जनताको लागि भनेर जीवन समर्पण गरेको व्यक्तिलाई किन यसरी निराधार आरोप लगाएर पाखा लगाउन खोजिन्छ भनेर दिक्दारी लागेको छ । तर, कसैले मेरो देश र जनताको सेवा गर्ने सोचलाई कमजोर पार्न फैलाएका यस्ता हौवाले म कत्ति पनि बिचलित हुने वाला छैन, यसले मलाई बरु थप उर्जाका साथ अघि बढ्न प्रेरणा मिल्नेछ । म आफ्नो कर्ममा अघि बढिरहनेछु ।
भनिन्छ नि – नबिराउनु नडराउनु । अब मैले गल्ती नै गरेको छैन भने म किन डराउने ? कसैलाई केही आरोप लागेको छ भने त्यसको छानविन गर्ने राज्यको निकाय छ । उसले नै यसको छानबिन गर्छ । यो सरकारको काम हो । तर, मलाई बद्नाम गर्न आरोप पुष्टि हुने आधार नै नभए पनि केही दोषी नै भए जसरी मलाई प्रस्तुत गरिरहेका छन् । कसैलाई व्यक्ति र मिडियाले यसरी प्रस्तुत गर्न मिल्छ ? के आधारमा उनीहरु मेरो संलग्नताको कुरा गरिरहेका छन् ? ममाथि अनेक आरोप लगाउनेहरुलाई मेरो चुनौती छ – मैले जस्तापाता बेचेको भनेर लगाइएको आरोप पुष्टि गरेर देखाऊ । होइन भने अनावश्यक बकबक बन्द गर । म राहतमा आएको जस्तापाता बिक्री गरेर पैसा कमाउनु पर्ने मान्छे होइन । नुवाकोटमा मेरो पैतृक सम्पत्ति नै मनग्ये छ, त्यसैलाई मैले सम्हाल्न सकेको छैन । पैतृक सम्पत्ति नै सम्हाल्न नसकेको मलाई किन चाहियो सम्पत्ति ? किन बेच्नुपर्यो मैले जस्तापाता ? यी सब अर्थमन्त्री रामशरण महत र मलाई बद्नाम पार्न रचिएको प्रपञ्च हो । यस्ता षड्यन्त्रले केही हुनेवाला छैन । खासमा यी जस्तापाताहरु अर्थमन्त्री रामशरण महत र मेरो आग्रहमा नुवाकोटमा भूकम्पले क्षति पुर्याएका विद्यालयका लागि भनेर लगिएका थिए । पठनपाठन नै हुन नसक्दा भोलीको भविष्य अन्धकारमा परिणत हुने देखेर हामीले पहल गरेर जस्तापाता पठाएका थियौं । तर, हामीले गरेको यो पवित्र काम केहीलाई सैह्य भएन । उनीहरु अहिले यसैलाई तोडमतोड गरेर हौवा फैलाउन खोज्दैछन् । हामीलाई बद्नाम गराउन खोज्दैछन् ।
जसरी अहिले जस्तापाता बेच्न खोजिएको थियो भनेर प्रचारबाजी भइरहेको छ, यो सरासर झुट हो । त्यो जस्तापाता बेच्न होइन, वितरणका लागि भनेर लैजान लागिएको थियो । यी बिक्री गर्न लागिएको भनेर आएका हल्ला त सबै बनावटी मात्रै हुन । केहीका स्वार्थ पूरा नभएपछि रचिएका कथा हुन् । मैले खेपिरहेको आरोप निराधार हो भन्ने केही आधारहरु छन् । जस्तो कि ती जस्तामा बैंकको लोगो टाँस गरिएको थियो । लोगो टाँस भएको सामान दुनियाँमा कतै पनि बिक्री हुन सक्दैन । अब एउटा बैंकको बकाइदा लोगो भएको जस्तापाता कुन व्यापारीले किन्छ र बिक्री गर्न खोजे होला मैले ? यसबाट पनि थाहा हुन्छ कि यो कति निराधार कुरा हो भनेर । मेरो चरित्र हत्या गरिएको छ, ममाथि अन्याय भएको छ । म यसको स्वतन्त्र छानविन होस् र सत्यतथ्य बाहिर आओस् भन्ने चाहन्छु । (अर्थमन्त्री डा. रामशरण महतका स्वकीय सचिव महतसँगको कुराकानीमा आधारित )
स्रोत : रातोपाटी
0 comments :
Post a Comment