दोलखा, जेष्ठ ६ ( भूकम्पले सिंगटी बजारको घरहरु भत्कदा पुरिएका मानिसहरुलाई १० दिनसम्म झिक्न नसकेपछि अमेरिकी विज्ञको टोली उद्धारका लागि आइपुगेको छ ।
संसारको विभिन्न देशमा ६ सयभन्दा बढी कुहिइसकेका शवहरु निकालेको अनुभवी ब्राइन स्मिथ स्वयमसेवी भूमिका निर्वाह गर्न बुधवार सिंगटी पुगेका हुन् । भवन भित्र फसेको शवहरु गन्हाइसकेको तर निकाल्न नसकीएको जानकारीका आधारमा उनी स्वयमसेवा गर्ने उद्धेश्यले आएको बर्दबहादुर गणले जानकारी दिएको छ । नेपाली सेनाको बर्दबहादुर गण र विज्ञ मिलेर सिंगटी र आसपास पुरिएका मानिसहरुको उद्धार गर्ने प्रमुख जिल्ला अधिकारी प्रेमलाल लामिछानेले बताए ।
दोलखाको उत्तरी १८ गाविसको मुख्य व्यापारिक केन्द्रमा बैशाख २९ गतेको भूकम्पले एउटावाहेक सबै घरहरु भत्किएको छ । घरहरु भत्कदा सिंगटीमा धेरै मानिसहरु हाताहात भएका थिए । करिब २ सय घर ध्वस्त भएको सिंगटी बजार दुर्गन्धित हुँदै गएपछि फसेका मानिसहरु जीवित रहने आसा समाप्त भएको उद्धारकर्ताहरुले अनुमान गरेका छन् । गन्हाउने शवहरुको निकाल्ने कार्यमा पोख्त ब्रयनले नेपाली सेनाको सहयोगमा बुधवारदेखि नै काम थालेको छ । ५ तले भवनभित्र फसेकालाई उद्धार गर्न सैनिक मुख्यालयबाट उपकरण पनि आउदै गरेको सेनाले जानकारी दिएको छ ।
यसअघि उपकरण अभाव देखाउदै सेनाले पुरिएका मानव उद्धार कार्य स्थगन गरेको थियो । बर्दबहादुर गणका गणपति विश्वासविक्रम शाहले भने, ुअमेरिकी विज्ञ सिंगटी पुगिसकेको छ, सैनिक मुख्यालयबाट स्काइभेटर आउने तयारीमा छ ।ु स्काइभेटर प्राप्त भएपछि घरका ढलान पन्छाएर फसेका शवहरु निकाल्न सजिलो हुने उनले बताए । उक्त उपकरणले अबरुद्ध सडक खोलेर आवागमणसमेत सजिलो पार्ने छ ।
उद्धारमा खटिएका नेपाली सेना र प्रहरीसहितको टोलीले यसअघि सिंगटी र आसपास गरी २९ जनाको शव निकालिसकेको छ । पहिलो दिनमा त्यहाा मेक्सिकन उद्धारकर्ताहरुले पनि केही मानिसलाई जीवितै उद्धार गरेको थियो ।
प्रहरीका अनुसार करिब १५ वटा शवहरु सिंगटीका घरभित्र र पहिरोभित्र रहेको छ । प्रहरी नायव उपरिक्षक अजय केसीले सिंगटीबाट लामावगरतर्फ र सोरुङतर्फ सडकहरुमा पहिरोले थिचिएकासमेत गरी त्यति शवहरु हुनसक्ने अनुमान छ । सडक खुलाउदै गरेका २ वटा डोजर, राहत बोकेर गएका ट्रक, हाइलक्स, बलेरो र मोटरसाइकलहरु २९ गतेको भूकम्पसागै आएको पहिरोले सोरुङखोलातर्फ पुरिएको छ । लामावगरतर्फ पनि बलेरो पहिरोले पुरिएको छ । हालसम्म त्यसक्षेत्रबाट सेना, जनपद र शसस्त्रको उद्धारकर्ताले हालसम्म २९ जनाको शव फेला पारेको छ । १२ जनालाई जीवितै उद्धार गरेको छ ।
सिंगटीबाट लामावगरसम्म २९ किलोमिटर र सिंगटीबाट १० किलोमिटर सोरुङखोलासम्म पहिरोमा पुरिएका मानिसहरुको पनि उद्धार गर्ने तयारी भैरहेको छ । सैनिक मुख्यालय र माथिल्लो तामाकोसीको उपकरणहरुले मानव उद्धार र सडक खुलाउने कार्य तत्काल थालिने जनकारी प्रमुख जिल्ला अधिकारी लामिछानेले दिएका छन् ।
0 comments :
Post a Comment