ताप्लेजुङ / ताप्लेजुङको भीषड पहिरोमा परी मृत्यु हुनेको सङ्ख्या ५३ पुगेको छ । १२ जना गम्भीर घाइते भएका छन् भने अरु केही हराइरहेका छन् । बुधवार साँझदेखि परेको अविरल बर्षाले ताप्लेजुङको पश्चिमी क्षेत्रका केही गाविस पूर्ण रुपमा बगाएको छ ।
प्रहरीले भने पहिरोमा पुरिएर मृत्यु भएकाको सङ्ख्या २१ पुगेको पुष्टि गरेको छ । प्रमुख जिल्ला अधिकारी डम्बरु निरौलाले नयाँ पेजसँग कुरा गर्दै भने, ‘मृत्यु हुनेको सङ्ख्या २१ पुगेको छ भने ३७ बेपत्ता छन् ।’ राष्ट्रिय समाचार समितिले भने पहिरोमा परी मृत्यु हुनेको सङ्ख्या ५३ पुगेको उल्लेख गरेको छ ।
प्रहरीले ताप्लेजुङका थिङलावु, खोक्लिङ, लिवाङ, सान्थाक्रा र लिङतेप गाविस पहिरोको अधिक प्रभाव परेको बताएको छ । पहिरोका कारण लिवाङ गाविसमा सबैभन्दा धेरै मानवीय क्षति भएको छ ।
अहिलेसम्म ज्यान गुमाएका पाँच जनाको मात्र सनाखत भएको प्रहरीले जनाएको छ । प्रहरीका अनुसार लिङतेपका चमेली लिम्बू र मनमाया लिम्बु, लिवाङका देबेन्द्र लिवाङ, खोक्लिङका सविन मादेन र बसन्त बिकको सनाखत भएको हो ।
जिल्लाको पश्चिमी गाविस थिङलाबु–६ बाट अहिले सम्ममा १२ जनाको शव निकालिएको छ । नेपाली सेना, नेपाल प्रहरी र स्थानीय बासी पहिरोमा परेकाहरुको उद्धारमा सक्रिय छन् ।
विभिन्न गाविसका केही स्थानीय सम्पर्कमा नआएकाले ज्यान गुमाउनेको सङ्ख्या अझै बढ्ने प्रहरीले बताएको छ । खामलुङ गाविसका केही वडामा पनि पहिरो गएको छ । पानी परिरहेकाले खोल्सा तथा खोला बढेका कारण उद्धारमा समेत कठिनाई भएको जिल्ला प्रहरी कार्यालय ताप्लेजुङले जनाएको छ ।
थिङलाबुमा पुग्ने मौवाखोलाको पुलहरु बगाएपछि प्रहरी प्रशासनसमेत त्यस क्षेत्रमा अहिलेसम्म पुग्न नसकेको प्रहरीले बताएको छ । यस्तै म्याङखामा पहिरो जाँदा मेची राजमार्ग अवरुद्ध भएको छ । पहिरोका कारण राजमार्ग अवरुद्ध हुँदा यात्रु अलपत्र परेका छन् ।
यसरी बग्दैछ पहिरो
0 comments :
Post a Comment