जेदु पोखरेल एनआरएन अमेरिका मेरिल्याल्ड शाखाका अध्यक्ष हुनुहुन्छ | एनआरएन अमेरिकाका नवनिर्वाचित कार्यसमितिको पहिलो बैठक र बृहत टाउन हल मिटिंग मेरिल्याण्डको बाल्टिमोरमाहुदैछ | पोखरेल कार्यक्रम तयारी समितिका संयोजक पनि हुनुहुन्छ | सोहि बिषयलाई लिएर पोखरेलसंग द नेपाल टुडेका सतिश चापागाईं ले गरेको कुराकानी प्रस्तुत छ :
जेदु जी, कार्यक्रमको तयारी कस्तो छ ?
हामी लगभग तयार अवस्थामा छौं | अन्तिम चरणका कामहरु गर्दैछौं | कार्यक्रम स्थल, पाहुनाहरुको आवास र खानाको बारेमा टुंगो लाग्यो | शुक्रबारदेखि सहभागीहरु आउने क्रम शुरु हुन्छ | हामीले यो कार्यक्रमलाई ऐतिहासिक बनाउने बारेमा लागिपरेका छौं |
मेरिल्याण्डको कार्यसमिति नै पूर्ण छैन | कसरी यति ठुलो काम गर्न सक्नुहुन्छ ?
मेरिल्याण्डका समाजसेवी र एनआरएन प्रेमीहरुको माया र सहयोगले नै हामीले सबै काम गर्न खोजेका हौँ | कार्यसमिति भन्ने प्राबिधिक कुरा हो | यो भेला कै क्रममा हामीले कार्यसमितिलाई पूर्णता दिने बारेमा सोचेका छौं | ब्यापक छलफल चलिरहेको छ | सबै पक्षलाई समेटेर कार्यसमितिको
पूर्णता दिनेछौं |
केन्द्र मै विवाद छ | च्याप्टरमा पनि विवाद छ भन्ने सुनेका छौ नी !
हामी प्रजातन्त्रमा विश्वास गर्छौं | संसारमा विवादरहित केहि पनि छैन | असहमति कै बीचबाट एउटा सहमति खोज्ने हो | यो प्रयास केन्द्रमा पनि जारि छ र च्याप्टरमा पनि भईरहेको छ | केन्द्रिय अध्यक्षले अति संयमित ढंगले यसको समाधान गर्ने प्रयास गर्नु भएको छ | केहिदिन मै सबैलाइ चित्त बुझ्ने गरि हामी आगाडी आउने छौं |
भनेपछि तपाइँ ढुक्क हुनुहुन्छ ?
सतप्रतिशत चित्त बुझाउन कसैले सक्दैन | हामीले बहुमत साथीहरुको राय र सुझाबका साथ् अगाडी बढ्ने प्रयास गर्नेछौं |
पार्टीगत रुपमा एकपक्षीय तरीकाले अगाडी बढ्न खोज्दा विवाद आएको हो भन्ने छ नी !
त्यस्तो केहि होइन | राजनीति गर्ने अरु ठाउं छन् | एनआरएनमा आएका साथीहरु विशुद्द समाजसेवाको भावनाले आउनु भएको छ | जहाँ पनि राजनीति देख्नु हुन्न | विवाद गर्ने साथीहरुका पनि त कहिकतै आस्था होला नी ! हामीले सबै मिलेर अगाडी बढौं भन्ने सोच राख्नै पर्छ |
अन्यथा के हुन्छ ?
भर्खर सुरु भएको संस्था हो | अमेरिकामा बस्ने धेरै नेपालीको आस्था बन्दैछ | अहिलेदेखि नै विवाद गर्यौं भने हामीले यसलाई राम्रो बनाउन सक्दैनौं | सबै मिलेर संगठन गरौँ | भोलिका दिनमा सबैलाई उचित स्थान मिल्छ | राजनीतिबाट मान्छेहरु वाक्क भएका छन् | सबैले समय मै सोच्न पर्छ |
यसपाली के के हुदैछ ?
हामीले केन्द्रिय समितिको बैठक र बृहत टाउन हल मिटिंग राखेका छौं | टाउन हल मिटिंगबाट आएका कुराहरुलाई केन्द्रिय समितिले विचार गर्छ र आफ्ना कार्ययोजनामा समाबेश गर्छ |
टाउन हल मिटिंग र केन्द्रिय समितिको यो बैठकको महत्व के हो ?
यो औपचारिक पहिलो बैठक हो | एजेन्डाहरु त केन्द्रिय समितिले नै तय गरेको छ होला | हामी आयोजक हौँ | मेरिल्याण्डबासी नेपालीहरुलाई यो अवसर हो | टाउन हल मिटिंगमा हाम्रा कुराहरु केन्द्रमा राख्न सकौं | हाम्रा आफ्नै थुप्रै समस्या छन् | देशका लागि गर्नु पर्ने कामहरु धेरै छन् | कम्तिमा केन्द्रिय समितिलाई एउटा खाका दिन सकियो भने यो दुई बर्षमा हाम्रा लागि र नेपालका लागि केहि सकारात्मक र ठोस पहल शुरु गर्न सकिन्छ | यहि नै हो |
कति जति सहभागीको अपेक्षा गर्नु भएको छ ?
झन्डै दुई सय पचास देखि तीन सय जनाको सहभागिता हुन्छ भन्ने अनुमान हो |
मेरिल्याण्डबासी नेपालीहरुबाट तपाईले गरेको आशा के हो ?
सबै मिलेर यो भेला र बैठक सफल पारौं | सबैजना सहभागी बनौ | हाम्रा समस्या के हुन्? के गरेर समाधान गर्न सकिन्छ? आफ्ना विचार राखौं |
About Unknown
0 comments :
Post a Comment