गोलबजार (सिरहा), ४ असार । नेकपा–माओवादीका उपाध्यक्ष सिपी गजुरेलले चार दलले गरेको १६ बुँदे सम्झौता खारेज नगरे आन्दोलनमा उत्रने चेतावनी दिएका छन् ।सिरहाको लहानमा आज बिहान सो पार्टीद्वारा आयोजित पत्रकार सम्मेलनमा उनले १६ बुँदे सम्झौताको आधारमा संविधान जारी भए आगो लगाउने बताए । उनले भने, “१६ बुँदे सम्झौताको विरोध गर्ने शक्तिहरुसँग छलफल जारी छ । उक्त पार्टीहरुसँग कार्यगत एकता गरेर हामी आन्दोलनमा जान्छौं ।”
उनले १६ बुँदे सम्झौता गरेर चार दलले जनतालाई दिनदहाडै ठगेको, धोका दिएको र विश्वासघात गरेको बताए । उनले उक्त सम्झौताका आधारमा बन्ने संविधान पश्चगामी हुने धारणा राख्दै त्यसको विरोधमा उत्रन जनतालाई आग्रह पनि गरे ।
“बहुदलीय संसदीय व्यवस्थाकै विरुद्धमा हामीले १० वर्षे जनयुद्ध लड्यौं”, उनले भने– “तर फेरि त्यही संसदीय व्यवस्था कायम राख्न सम्झौता भएको छ । यो आपत्तिजनक छ । पुष्पकमल दाहालले सम्झौतामा हस्ताक्षर गरेर जनतालाई धोका दिए ।”
दाहालले क्रान्तिसँग विश्वासघात गरेको भनी आक्रोश पोख्दै उपाध्यक्ष गजुरेलले अब एनेकपा (माओवादी)सँग पार्टी एकता नहुने बताए । रासस
0 comments :
Post a Comment