जिरी(दोलखा), जेष्ठ २५ -
भूकम्पले ध्वस्त बनेको जिरी फेरि उभिने प्रयत्न थालेको छ । स्विस सहयोगमा ५८ वर्षअघि विकास भएको जिरीलाई भूकम्पले पूरै सुताईदिएको थियो ।
स्विट्जरल्यान्डको जुरीच सहर जस्तै भूगोल रहेको जिरीमा स्विसले २०१४ सालदेखि पाँच दशक लगाएर बनाएको संरचनाहरु मध्ये सडक बाहेक अन्यको निसाना नै मेटिने गरी भूकम्पले विनाश गर्यो ।
अहिले मानिसहरु धमाधम स्थायी प्रकृतिका टहरा बनाएर सर्दै छन् । विद्यालयहरु धमाधम बनाइँदैछ । विभिन्न पार्टीका युवा र विद्यार्थीले विद्यालय बनाइरहेका छन । उनीहरुसँगै शिक्षक र विद्यार्थी पनि निर्माणमा जुटिरहेका छन् । त्यस क्षेत्रका सभासद् तथा एमाले केन्द्रीय सदस्य पार्वत गुरुङले ध्वस्त जिरीले नयाँ गन्तव्य सुरु गरेकोमा केही उत्साह थपिएको बताए ।
बैशाख २९ गतेको भूकम्पलगत्तै उनी जिरी आउँदा जम्माजम्मी २ घर सग्ला देखेका थिए । सबै घर ढलेका, प्वाल परेका, चर्किएका थिए । २१ सय १५ घरधुरीमध्ये एकादुई मात्र बस्नयोग्य थिए । स्वीसले बनाइदिएको प्राविधिक शिक्षालयका ७७ वटा भवनहरु सबै सखाप थियो । जिरी अस्पताल, पशुसेवा जस्ता स्वीसको उपहार ध्वङ्स थिए । मानिसहरुमा केही गर्ने जाँगर देखिदैन थियो ।
भर्खरै नगरपालिका घोषित यहाँको जनसंख्या १७ हजार ६ सय छ । भूकम्पछि नराम्ररी थलिएका स्थानीय मानिसहरु आ—आफ्नो पेसा व्यवसायमा फर्कने प्रयत्नमा छन् ।
‘मानिसहरु फेरि यहीँ ठाउँमा भविश्य खोज्न थालेका छन,’ जिरीका पूर्व गाविस अध्यक्ष तथा कांग्रेस नेता टंक जिरेल भन्छन् । उनको लगानीमा बनेको होटल पनि भत्किएको छ । यहाँका ५० हाराहारीको होटलमध्ये लगभग एउटा काम लाग्ने छ । एमाओवादी नगर इन्चार्ज नवीन जिरेल भयावह अबस्थाबाट जिरी विस्तारै शान्ततर्फ फर्कदै गरेको बताउँछन् । आफ्नै थातथलोमा भविश्य खोज्दै बसेका युवा नेता नवीनका अनुसार पार्टीको तर्फबाट ध्वस्त संरचना पन्छाउने र निर्माणको योगदान गरिरहेको जानकारी दिए ।
जिरीको सबैभन्दा सुन्दर थलो ३ सय रोपनी ओगटेको जिरी प्राविधिक शिक्षालयका प्राचार्य रामहरी खनाल ध्वस्त संचना वरपर अस्थायी आवास बनाउदै छन् । करिब ५ सय विद्यार्थीलाई प्राविधिक सीप बाँड्ने शिक्षालय चलाउन उनलाई चुनौती छ । केही महिनापछि त कक्षा चलाउनैपर्छ अस्थायी संरचना निर्माणस्थलबाट फुर्सद लिदै उनले भने ।
हाटडाडाँ जिरीको पुरानो बजारका बँचेका घर र कटेराहरुमा विहानदेखि साँझसम्म चहलपहल हुन थालेको छ । लिंकन बजार पुग्नु पहिलेको यो बजारमा किनमेल गर्न, चिया पिउन र गफ गर्न मानिसहरुको जमघट बढ्दै छ । लिंकन बजार भने अधिक क्षति भएकाले मानिसहरु निर्माणमा जुटेका छन् । भत्किएको घर अगाडी नै टहरा बनाएपछि फराकिलो बजार गल्ली जस्तै देखिन्छ ।
कान्तिपुर दैनिकबाट
0 comments :
Post a Comment