एक सयभन्दा बढी फिल्ममा अभिनय गरिसकेकी झरना आफू बाहिरभन्दा भित्र अझै सुन्दर भएको दाबी गर्छिन् । ‘म मनको सुन्दरताको पक्षमा छु । म सधैँ खुसी रहने गर्दछु । मनको खुसी मुहारमा झल्किन्छ,’ आफू सुन्दरी देखिनुको ‘राज’ पनि यसमै रहेको बताउँदै उनी भन्छिन्, ‘सधैँ सकारात्मक सोच राख्ने, सबैको भलो चाहने र सुविचार मात्र गर्यो भने त्यसै राम्री भइन्छ ।’
झरना सुन्दरता हेराइमा भर पर्ने बताउँछिन् । ‘कसले कुन नजरले हेर्छ, त्यसमा भर पर्छ,’ उनी भन्छिन्, ‘सुन्दरता मापन गर्ने कुनै यन्त्र या मापदण्ड छैन । त्यसैले यो सब हेराइमा भर पर्छ ।’ फिल्ममा अझ राम्री देखिनका लागि मेकअपको प्रयोग गर्ने गरे पनि रियलमा भने सजिएर हिँड्न मन पर्दैन रे उनलाई ।
‘मलाई नेचुरल ब्युटी नै मन पर्छ । त्यसैले बाहिर हिँड्दा धेरै सजिने गरेकी छैनँ,’ उनी भन्छिन्, ‘सुटिङमा त क्यारेक्टरअनुसारको ड्ेरसअप र मेकअप गर्नुपर्छ । तर, मलाई बाहिर विनामेकअपै हिँड्न मन पर्छ ।’ मेकअप प्रसाधनमा पनि उनको उत्तिसाह्रो ‘इन्ट्रेस्ट’ छैन । गर्मीको वेला घामबाट बच्न हल्का सनलोसन लगाउने गरे पनि अन्य कस्मेटिक आइटमको भने उनी खासै प्रयोग गर्दिनन् । गाजल भने उनको फेभरेट कस्मेटिक हो । ‘मलाई गाजल निकै मन पर्छ,’ उनी भन्छिन्, ‘त्यसैले हम्मेसी गाजल लगाउन छुटाउँदिनँ ।’
स्वस्थ रहिरहनका लागि झरनाले हरेक दिन योगा गर्ने गरेकी छिन् । बिहान सात बजे उठ्ने गरेकी उनी झन्डै आधा घन्टा योगा गर्छिन् । मर्निङवाक गर्ने बानी भने छैन उनको । ‘म घरमै योगा गर्छु । मर्निङवाक गर्ने बानी छैन,’ उनी भन्छिन्, ‘मर्निङवाक गर्न जाँदा कुकुरले लखेट्लान् भन्ने डर लाग्छ । त्यसैले त्यो बानी बसेको छैन ।’
हरदम फिट एन्ट फाइन रहनका लागि खानपिनमा पनि उत्तिकै ध्यान दिने गरेकी छिन् उनले । मद्यपान र धुम्रपानबाट टाढै रहेकी झरना दिनमा सात लिटरभन्दा बढी पानी पिउने गरेको बताउँछिन् । ‘म पानी म्याक्सिमम पिउँछु,’ उनी भन्छिन्, ‘पानीले स्किन क्लिन राख्नुका साथै रोग र अल्छी लाग्नबाट बचाउँछ ।’
पहिला उनी जिम गर्नका लागि दिनहुँ नै गौशालास्थित स्व. श्रीकृष्ण श्रेष्ठको फिटनेस सेन्टर जाने गर्थिन् । तर, पछिल्लो समय उनी हप्तामा दुई–तीनचोटि लाजिम्पाटस्थित स्टेप फिटनेस क्लब जाने गर्दछिन् । त्यहाँ एरोबिक्स, जिम, जुम्बालगायतका हल्का एक्सरसाइज गर्ने गरेको उनी बताउँछिन् ।
राति एघार बजेसम्म सुतिसक्ने बानी छ उनको । ‘नेट चलाउने, टिभी हेर्ने, किताब पढ्नेलगायतका कामले कसोकसो एघार बजिहाल्छ । त्यसपछि मात्रै सुत्छु,’ झरना भन्छिन्, ‘अलि छिटो सुत्ने बानी बसाल्ने कोसिस गरेकी छु । तर, अहिलेसम्म सफल भएकी छैनँ ।’
पछिल्लो समय उनी फिल्म सुटिङमा व्यस्त छैनन् । भूकम्पपछिका दिनमा राहत संकलन तथा वितरण कार्यमा लागेकी उनी आफूले निर्देशन गर्न लागेको ए मेरो हजुर–२ को सुटिङ पनि केही पर सरेको बताउँछिन् । अबको केही दिनमा गीत रेकर्डिङ गर्न लागेकी म्युजिक भिडियोमा भने व्यस्त भई नै रहेकी छिन् ।
हाल ५१ किलोकी झरनालाई आफ्नो तौल अलि बढाउन पाए हुन्थ्यो भन्ने लागेको रहेछ । ‘५५ सम्म हुन पाए हुन्थ्यो भन्ने लाग्छ,’ भगवान्को कृपाले अहिलेसम्म कुनै पनि रोग नलागेको बताउँदै उनी भन्छिन्, ‘अहिलेसम्म कुनै औषधि खानुपरेको छैन । सधैँ यस्तै स्वस्थ भइरहन चाहन्छु ।’
पहिला हरेक साउन महिनामा व्रत बस्दै आएकी झरनाले यसपाली भने व्रत राखेकी छैनन् । उनी भन्छिन्, ‘पहिलाका वर्षमा साउने सोमबारको व्रत लिने गरेकी थिएँ । तर, यसपाली भने मैले सन्तोषी माताको व्रत लिएकी छु । त्यसैले धेरै भार पर्छ भनेर सोमबारको व्रत लिइनँ ।’ एक सातामा दुई दिन व्रत बस्न त्यति व्यावहारिक नभएको उनले बताइन् ।
‘मनको शान्ति र दीर्घ जीवनका लागि व्रत राखेकी हुँ,’ उनी भन्छिन्, ‘व्रत बसेर भगवान्ले केही दिन्छन् भन्ने चाहना मेरो छैन । मनको शान्ति र दीर्घ जीवनका लागि व्रत बस्ने गरेकी छु ।’ भगवान्ले आफ्ना सबै इच्छा पूरा गरिदिएकाले उनी आफूलाई निकै भाग्यमानी ठान्छिन् । ‘मलाई नपुग्दो, असन्तोष केही छैन । मेरा हरेक इच्छा, चाहना पूरा भएका छन्,’ उनी भन्छिन्, ‘तर पनि कहिलेकाहीँ मन भड्किन सक्छ, त्यसैले व्रत लिने गरेकी हुँ ।’
तीजको व्रत भने बस्ने योजना उनको छ । ‘पहिलादेखि नै बसिआएकी छु । त्यसैले तीजको व्रत भने कसैगरी छुटाउँदिनँ,’ झरना भन्छिन्, ‘व्रत बस्नाले मन शान्त र खुसी हुन्छ । मन खुसी भएपछि तन त्यतिकै राम्रो हुन्छ ।’
नयाँ पत्रिका
0 comments :
Post a Comment