संविधानको संक्रमणकालीन व्यवस्था अन्तर्गत मुलुकको दोस्रो राष्ट्रपति तथा उपराष्ट्रपति चयन गर्ने प्रक्रिया थाल्न दिउँसो तीन बजे संसदको बैठक बस्दैछ ।
बैठकले निर्बाचन कार्यतालिका सार्वजनिक गर्नुको साथै संसदका महासचिवलाई निर्बाचन अधिकृत तोक्नेछ । नयाँ संविधानको धारा २९७ को उपधारा २ अनुसार सहमतिमा राष्ट्रपति तथा उपराष्ट्रपति चयन गर्नका लागि सभामुखले केही समय दिन सक्ने संवैधानिक व्यवस्था छ । सोही अनुसार सभामुख ओनसरी घर्तिले सहमतिका लागी भोली आइतबारसम्मका लागी दलहरुलाई समय दिन सक्ने छिन् ।
निर्बाचन प्रक्रिया जारी रहुन्जेल अर्थात नयाँ राष्टपति चयन नहुन्जेल राष्ट्रपतिको सम्पूर्ण कार्यभार सभामुखले लिनुपर्नेछ । दलहरुबिच सहमतिको सम्भावना शनिबारसम्म देखिएको छैन । बहुमतिय प्रक्रियामा गए भोली अर्थात आइतबार साँझसम्म मुलुकले नयाँ राष्ट्रपति तथा उपराष्ट्रपति प्राप्त गर्नेछ ।
शनिबार साँझसम्म दुवै पदका लागी सहमतिय उम्मेदवार बनाउन दलहरुविच छलफल हुने बताइएपनि छलफलका लागी कुनै दलले पहल गरेको छैन ।
प्रमुख प्रतिपक्षी दल नेपाली कांग्रेस र मधेसवादी दलको एक उम्मेदवार र सत्ता साझेदार दलहरुको एक उम्मेदवार हुने सम्भावना रहेको समेत दलका नेताहरुले बताउने गरेका छन् ।
कांग्रेस-मधेसवादीका तर्फबाट हालका राष्ट्रपति रामबरण यादवकै निरन्तरता, तमलोपा नेता महन्त ठाकुर वा कांग्रेस नेता कुल बहादुर गूरुङ र मानबहादुर विश्वकर्माको चर्चा छ भने सत्तासाझेदार दलका तर्फबाट एमाले नेताहरु झलनाथ खनाल, विद्या भण्डारी, एमाओवादी नेता अमिक शेरचन, नन्दकिशोर पुन पासाङको समेत चर्चा छ ।
0 comments :
Post a Comment