English Edition

नेपाल संवत् जनताको मौलिक संवत हो : प्रम

काठमाडौँ, २६ कात्तिक । प्रधानमन्त्री केपी शर्मा ओलीले नेपाल संवत ११३६ को नयाँ वर्ष शुभारम्भका अवसरमा समस्त नेपालीमा शुभकामना व्यक्त गर्दै यो संवत् नेपाली जनताको संवत् भएको बताएका छन् ।

ऋणमा डुबेका नेपालीलाई शङ्खधर साख्वाले ऋणमोचन गराई सुरु गरेको नेपाल संवत नेपालीको मौलिक संवत् भएको जनाउँदै राष्ट्रिय विभूति साख्वा:प्रति सम्मानसमेत व्यक्त गरेका छन् । उनले नेपाल राष्ट्रका नाममा सुरु भएको नेपाल संवत कुनै शासनको नाममा नभएकाले पनि जनताको संवत भन्ने स्पष्ट हुने बताए ।

“ऋणमा डुबेका नेपाली जनतालाई उहाँले ऋणमोचनका साथ दासत्वबाट मुक्त गराई सामाजिक सुधारको आरम्भ गर्नुभएको थियो, यसअर्थमा शङ्खधर साख्वाः एक प्रगतिशील समाज सुधारक र नेपाल संवतका जन्मदाता हुनुहुन्थ्यो भने नेपाल संवत नेपालीले सुरु गरेको आफ्नै संवत थियो”– सन्देशमा भनिएको छ– “गरिबीले व्याप्त समाज र जनतालाई ऋणबाट मुक्त गर्न शङ्खधर साख्वाःले आफूसँग भएको धनसम्पत्ति सदुपयोग गर्नुभएको थियो ।”

सन्देशमा भनिएको छ– “राष्ट्रिय एकता र सामाजिक सद्भावलाई विकसित गर्नुपर्ने यो महत्वपूर्ण अवसरमा जनतालाई गरिबीबाट मुक्त गरी समृद्ध पार्नुपर्ने राष्ट्रिय दायित्व हामीसँग छ, लोकतन्त्र, शान्ति, स्थायित्व, सामाजिक न्याय, समानता र राष्ट्रिय एकता सुदृढ बनाउने अभिभारा पूरा गर्न नेपाल संवतको यो अवसरमा म सम्पूर्णमा हार्दिक आह्वान पनि गर्दछु ।”



नेपाल संवतले सहिष्णुता, सामाजिक एकता र सद्भाव वृद्धि गरोस: राष्ट्रपति

राष्ट्रपति विद्यादेवी भण्डारीले नेपाल संवत् ११३६ का अवसरमा स्वदेश तथा विदेशमा रहेका सम्पूर्ण नेपाली दाजुभाइ तथा दिदीबहिनीको सुख, शान्ति, समृद्धि र उत्तरोत्तर प्रगतिका लागि शुभकामना व्यक्त गरेकी छन् ।

नेपालीको आफ्नै मौलिक संवतका रुपमा रहेको नेपाल संवतले सबै नेपालीमा सहिष्णुता, सामाजिक एकता र आपसी सद्भाव अभिवृद्धि गर्नाका साथै सबै नेपालीमा भाइचाराको भावनासमेत सुदृढ गर्न योगदान दिने विश्वास उनले व्यक्त गरेकी छन् ।

तस्बिर : नेपाल संवत् ११३६ नयाँ वर्ष (न्हूदँ)को अवसरमा राष्ट्रिय विभूति शंखधर साख्वाः प्रतिष्ठान मध्यपुर थिमिद्वारा आयोजित
माल्यार्पण कार्यक्रमको उद्घाटन गर्दै प्रधानमन्त्री केपी शर्मा ओली / रत्न श्रेष्ठ, रासस
Share on Google Plus

About Unknown

We bring you the latest breaking news that are happening around the world. For daily news, celebrity gossips, scoops, scandals, sports news, crime news and many more, don't forget us to visit ... www.nepalhamro.com.
    Blogger Comment
    Facebook Comment

0 comments :

Post a Comment