जाडो यामसंगै हिमाली क्षेत्रका विद्यालयहरु धमाधम बन्द

तराई आन्दोलनका कारण बिद्यार्थीहरु बिद्यालय जानबाट बञ्चित हुँदा हिमाली जिल्लाहरुमा भने धमाधम बार्षिक परिक्षा सकाएर बिद्यालय बन्द गर्न थालिएको छ । जाडो मौसम सुरु भएसंगै हुने व्यापक हिमपातका कारण नेपालका हिमाली जिल्लाहरुमा ६ महिनामा शैक्षिक सत्र पुरा हुन्छ । हिमालपारीको जिल्ला मनाङका सबै विद्यालयले बार्षिक परीक्षा सकाएर फागुनसम्मका लागि बन्द गरिसकेका छन् । हिमाली जिल्ला भएका कारण जिल्लाको १३ वटै गाविसमा रहेका सबै विद्यालयहरु बन्द गरिएको छ । 
मनाङमा हरेक बर्ष पुस १० देखि जाडो विदा हुने गरेपनि विद्यालयहरुले चाँडै गरी बार्षिक परीक्षा सकाएर विद्यालय बन्द गराएका हुन् । विद्यालयहरुले यस बर्षको जिल्ला स्तरीय परीक्षा पनि सकाएर नतिजा समेत सार्बजनिक गरिसकेका छन् । व्यवहारिक समस्यालाई मिलाएर विद्यालय बन्द गरिएको हुन सक्ने जिल्ला शिक्षा कार्यालय मनाङका जिल्ला शिक्षा अधिकारी श्रीप्रसाद गुरुङले बताउनुभयो । शिक्षा कार्यलयले औपचारिक निर्णय नगरेपनि व्यवहारिक समस्या भएकाले विद्यालय बन्द गरिएको शिक्षा कार्यलयले जानकारी दिएको छ । बाह्रै महिना हिउँ जम्ने भएकाले माथिल्लो मनाङका केही विद्यालयहरुमा मुश्किलले ६ महिनामात्रै पढाई हुन्छ ।

Share on Google Plus

About Unknown

We bring you the latest breaking news that are happening around the world. For daily news, celebrity gossips, scoops, scandals, sports news, crime news and many more, don't forget us to visit ... www.nepalhamro.com.