भारतले लगाएको नाकाबन्दीले मूल्यवृद्धि दुई वर्षपछि दोहोरो अंकमा

भारतले लगाएको नाकाबन्दीका कारण मूल्यवृद्धि दुई वर्षपछि दोहोरो अंकमा पुगेको छ । नेपाल राष्ट्रबैंकलेसार्वजनिक गरेको आर्थिक स्थितिअनुसार कात्तिकमा मूल्यवृद्धि १० दशमलब ४ प्रतिशत पुगेको छ । २०७० कात्तिकमा मूल्यवृद्धि १० प्रतिशत थियो । २०७० मा संविधानसभा निर्वाचनका कारण पैसाको आपूर्ति बढेको हुँदा मूल्यवृद्धि दोहोरो अंकमा गए पनि यसपटक भारतले लगाएको नाकाबन्दीका कारण मूल्यवृद्धि दोहोरो अंकमा पुगेको हो । एक महिनामा मात्र मूल्यवृद्धि २ दशमलब २ प्रतिशत बढेको छ । असोजमा यस्तो वृद्धि ८ दशमलब २ प्रतिशत थियो । अघिल्लो वर्ष कात्तिकमा मूल्यवृद्धि ७ दशमलब २ प्रतिशत थियो । राष्ट्रबैंकका अनुसार क्षेत्रगत आधारले मूल्यवृद्धिको सबैभन्दा बढी मार काठमाडौं उपत्यकावासीले भोग्नुपरेको छ । काठमाडौं उपत्यकाको मूल्यवृद्धि ११ दशमलब ८ प्रतिशत पुगेको छ । पहाडमा ११ दशमलब ४ र तराईमा ९ दशमलब १ प्रतिशत मूल्यवृद्धि भएको राष्ट्रबैंकको तथ्यांक छ । त्यस्तै हिमालमा ९ दशलमब ६ प्रतिशत मूल्यवृद्धि भएको छ । राष्ट्रबैंकको तथ्यांकअनुसार दाल र गेडागुडीको मूल्य सबैभन्दा बढेको छ । कात्तिकसम्ममा दाल र गेडागुडी उपसमूहको मूल्यवृद्धि ४४ प्रतिशत पुगेको छ । घिउ र तेल उपसमूहमा मूल्यवृद्धि ४१ दशमलब १ प्रतिशत पुगेको छ । लत्ताकपडा र जुत्ताचप्पलमा १४ दशमलब ४ प्रतिशत मूल्य बढेको छ । नेपालको मूल्यवृद्धिमा भारतको मूल्यवृद्धिको चाप सधैं परेको हुन्छ । अहिले डलरको तुलनामा भारतीय मुद्राको अवमूल्यन भएको हुँदा सामान्य अवस्थामा पनि मूल्यवृद्धि हुन्थ्यो । भारतमा अहिले ५ दशमलब ४ प्रतिशत मूल्यवृद्धि छ । राष्ट्रबैंकले चालू आर्थिक वर्षको मौद्रिक नीतिमा मूल्यवृद्धिलाई आठ प्रतिशतको सीमामा राख्ने लक्ष्य लिएको थियो । 

Share on Google Plus

About Unknown

We bring you the latest breaking news that are happening around the world. For daily news, celebrity gossips, scoops, scandals, sports news, crime news and many more, don't forget us to visit ... www.nepalhamro.com.