पुर्ननिर्माण प्राधिकरण गठनको बाटो खुल्यो, भूकम्पपीडितलाई राहत मिल्ने

भूकम्प गएको ८ महिनापछि संसदले बनाएको पुनर्निर्माण सम्बन्धी कानुनले प्राधिकरण गठनको ढोका खुल्ला गरेको छ । व्यवस्थापिका संसदले भूकम्पबाट प्रभावित संरचनाको पुनर्निर्माण सम्बन्धी विधेयक पारित भएसंगै प्राधिकरणको बाटो खुलेको हो । अर्थमन्त्री विष्णु पौडेलले विधेयक पारित भएसँगै पुनर्निर्माणले गति लिने बताउनुभयो । यसअघि सुशील कोइराला नेतृत्वको सरकारले गएको असार १० गते दाता सम्मेलन हुनुभन्दा केही दिनअघि अध्यादेश मार्फत पुनर्निर्माण प्राधिकरण गठन गरेको थियो । अध्यादेश बमोजिम गठन भएको प्राधिकरण ६० दिन भित्र संसदबाट अनुमोदन गराउन नसक्दा प्राधिकरण स्वतः निष्क्रिय भएको थियो । दलहरुबीच लामो विवाद र छलफलपछि पारित भएको पुनर्निर्माण सम्बन्धी विधेयकले निर्देशित गरे बमोजिम भूकम्प पीडितको पक्षमा धमाधम काम हुने अर्थमन्त्री विष्णु पौडेलले बताउनुभयो । प्रधानमन्त्रीको अध्यक्षतामा गठन हुने प्राधिकरणमा ११ जना सदस्य हुने छन् । मन्त्री र विज्ञसहितको बोर्डमा दैनिक प्रशासनिक काम अगाडि बढाउन प्रमुख कार्यकारी (सिइओ) रहने व्यवस्था छ । प्राधिकरणले, पुनस्र्थापना र पुनर्निर्माण कार्यमा समन्वयात्मक ढंगले नीति तथा कार्यक्रम तर्जुमा गरी तोकिएको समयभित्र कार्यान्वयन गर्ने–गराउने काम गर्छ ।
सुरक्षा, प्रशासनिक, विकास निर्माणसँग सम्बन्धित निकाय, गैरसरकारी संस्था, दातृ निकाय, अधिकारकर्मी, सञ्चार क्षेत्र, स्थानीय समुदाय आदिलाई आवश्यकता अनुसार परिचालन गर्ने काम पनि प्राधिकरणको हो । प्राधिकरण गठन भएपछि भूकम्प पीडितले घर बनाउन किस्ताबन्दी रकम पाउन थाल्ने विश्वास गरिएको छ ।

Share on Google Plus

About Unknown

We bring you the latest breaking news that are happening around the world. For daily news, celebrity gossips, scoops, scandals, sports news, crime news and many more, don't forget us to visit ... www.nepalhamro.com.