पश्चिममा बाढी र पहिरोको त्रास
लुम्बिनी टाइम्स | शुक्रबार, ११ असार ।
36 36 0
काठमाडौ । अविरल वर्षापछि आएको बाढीका कारण पश्चिम क्षेत्रको जनजीवन प्रभावित भएको छ । दुइदिनदेखि निरन्तर परेको बर्षाका कारण महाकाली तथा दोदा नदीमा पानीको बहाब बढेपछि नदि किनारमा बासोबास गर्दै आएका बासिन्दा त्रासमा छन् । यस्तै अविरल बर्षाका कारण पहाडी क्षेत्रमा पहिरोको जाखिमपनि बढेको छ ।
कञ्चनपुरका महाकाली र दोदा नदीमा पानीको बहाव खतराको बिन्दुभन्दा माथि बग्न थालेपछि उच्च सतर्कता अपनाइएको छ । नदी तटीय क्षेत्रका बासिन्दालाई उच्च सतर्कता अपनाउन लगाइएको छ । महाकाली नदीमा पानीको बहाव दुई लाख क्यूसेक भन्दा माथि पुगेपछि सीमा पुल वनबसाको आवागमन बन्द गरिएको छ ।
नदी तटीय क्षेत्रमा बसोबास गर्ने बासिन्दालाई सम्भावित बाढीको खतराबाट सुरक्षित क्षेत्रमा सार्न नेपाल प्रहरी र सशस्त्र प्रहरीलाई त्यसतर्फ परिचालन गरिएको जिल्ला प्रहरी कार्यालय कञ्चनपुरका प्रहरी नायब उपरीक्षक अभिनारायण काफलेले बताए । जल तथा मौसम विभाग फिल्ड कार्यालय अत्तरियाका अनुसार कञ्चनपुरमा आज एक सय ७५ मिलिमिटर वर्षा भएको छ ।
यस्तै महाकाली नदीमा आएको बाढीले दार्चुला जिल्ला सदरमुकाम खलंगाका तीन घर बगाएको छ । अपी नगरपालिका–११ बंङ्गाबगडका गणेश सिंह बोहरा, हर्क सिह महरा र गजैसिह महराको घर बाढिले बगाएको हो ।
त्यसैगरी सोही स्थानमा रहेको कैलाशपति निमावि छाङ्गरु र ब्यांस गाविसको भवन लगायत एक दर्जन भवनहरु पुर्णरुपमा जोखिममा रहेका छन । नदीको सतह बढिरहेकाले जोखिम बढेको भन्दै कैलाशपति निमावि तीन दिनका लागि बन्द गरिएको छ ।
पानीको बहाब बढेसँगै शारदा ब्यारेजमा रहेको वनबासा पुलमा सवारी–साधनमा रोक लगाइएको छ ।नदीमा पानीको सतह बढेपछि तटबन्ध निर्माण कार्य पूर्ण रुपमा प्रभावित भएको छ । नदीमा पानी बढेसँगै ठेकेदारहरुले आफ्नो निर्माण सामग्रीहरु सुरक्षित स्थानमा सारेका छन ।
यसैगरी पाँच घन्टासम्म निरन्तर परेको मुसलधारे पानीका कारण बाँकेको नेपालगञ्ज जलमग्न भएको छ । घरहरु डुबानमा पर्दा पश्चिम क्षेत्रको मुख्य शहर नेपालगञ्जको जनजीवन अस्तव्यस्त बनेको छ । दुइदिनदेखि लगातार पानी पर्नुका साथै गएराती पाँच घन्टासम्म मुसलधारे पानी परेको थियो ।
त्यहाका विपि चोक, गणेशपुर, भृकुटीनगर लगायतका स्थान डुबानमा परेको स्थानीयबासीले बताएका छन् । अहिले डोजर लगाएर पानी निकास गर्ने काम भइरहेको प्रहरीले जनाएको छ । नेपालगञ्ज जलमग्न भएपछि बर्दियामा पनि उच्च सतर्कता अपनाइएको छ।
यस्तै कैलालीमा पनि दुई दिनदेखिको मनसुनी वर्षासँगै सम्भावित बाढी र डुवानको खतराबाट जोगिन सतर्कता अपनाइएको छ । जिल्ला प्रशासन कार्यालय कैलाली अन्तर्गत बनेको जिल्ला आपत्कालीन कार्य सञ्चालन केन्द्रले जिल्लावासीलाई वर्षाका कारण सम्भावित बाढी डुवान र पहिरोको खतराबाट सजग रहन आग्रह गरेको छ ।
केन्द्रले सुरक्षा निकाय, स्थानीय विपद् व्यवस्थापन समिति र कार्यदल, रेडक्रस सोसाइटीको सम्पूर्ण शाखा र विभिन्न सङ्घसंस्थालाई उच्च सतर्कतामा रहन आग्रह गरेको छ । बुधबार रातिदेखि यस क्षेत्रमा निरन्तर वर्षा भइरहेको कारण कैलाली जिल्लाको फुलवारी, पवेरा रतनपुरलगायतका क्षेत्रमा वर्षाको पानी जमेपछि आवागमनमा कठिनाइ भएको छ ।
प्रतिकात्मक तस्विर
प्रतिकात्मक तस्विर
About Unknown
0 comments :
Post a Comment